Skodvin-elevane må venta på Lindås-skule.
Skodvin-elevane risikerer å bli flytta til ein byggeplass og brakkeløysing på Lindås barneskule.
Eit formannskaps-fleirtal med Krf, Høgre, Sp og Venstre meiner det vil vera meiningslaust å flytta elevane frå Skodvin til Lindås, for så å koma tilbake til ein privatskule på Skodvin eitt år seinare.
Dei reagerer kraftig på at FrP og AP vil gjennomføra flyttinga som planlagt, sjølv om barneskulen på Lindås ikkje står ferdig.
Arne Ramslien (Krf) synest den negative haldninga til å utsetja overflytting, osar av mistillit til Skodvin-foreldra og det dei kan få til.
- Uansvarleg
- Dette handlar ikkje om politikk - all sunn fornuft tilseier at vi ikkje flyttar elevar frå ein nedlagt skule midt i ein byggeprosess på mottakarskulen.
- Noko anna er uansvarleg, sa Arne Ramslien etter å ha høyrt Knut Bjørnevoll overfor formannskapet slå fast at det ikkje er mogleg å bli ferdig med Lindås barneskule til den tid Skodvin-elevane skal overflyttast.
- Luktar omkamp
- Dette luktar av omkamp i skulesaka, meiner mindretalet frå Frp og Ap.
- Det kan høyrast ut som vi skal flytta ungane til ei steinrøys. Eg har tillit til at administrasjonen får på plass gode løysingar, seier Sveinung Valle (Ap).
- Mykje vil vera klart på Lindås. Det er ikkje uvanleg at det skjer byggearbeid på ein skule medan det pågår undervisning, påpeika Bjarte Vatnøy (Frp), og viste til blant anna Leiknes og Knarvik ungdomsskule som ferske eksempel.
Han vil følgja opp skuleplan-vedtaket og vil ha ro i skulen.
– Men om Skodvin i neste omgang vil etablera privatskule er det ikkje oss i mot, la han til.
- Tilleggsbelastning
Odin Kristiansen (V) ba dei folkevalde følgja opp dei klare intensjonane i skuleplanen om at mottakarskulane skal stå ferdige før elevar frå dei nedlagde skulane blir overflytta.
- I skuledebatten la representantar frå alle parti stor vekt på elevane sitt beste. Det gjer vi ikkje ved å flytta elevane til ein mottakarskule som ikkje står ferdig til å ta imot dei. Det medfører ei betydeleg tilleggsbelastning for dei som blir flytta, seier Leif Sleire (H).
Han meiner også det vil vera dyrt å lite hensiktsmessig å flytta Skodvin-elevane til Lindås, dersom det medfører at det må setjast opp brakkebygg under byggeperioden.
- Ingen ulemper
- Hadde vi tatt stilling til skuleplanen før jul, slik planen var, ville Skodvin hatt tid på seg til å søkja om privatskule-drift innan nedleggings-tidspunktet, påpeika Anna Valle (Sp).
Ho kan ikkje sjå kva ulemper det er for kommunen å utsetja nedlegginga eit år.
- Tenkjepause
- Det kan vera bra å få eit år på Lindås barneskule, før foreldra i Hundvin-krinsen tar stilling til om barna deira skal fortsetja på offentleg skule eller begynna på privatskule på Skodvin, seier Astrid Namtvedt Sylta (Ap).
- Det verkar som enkelte tar meir politisk omsyn enn omsyn til ungane. Vi har dårlege erfaringar med å flytta elevar til eit anleggsområde, påpeika Nils Træland (H).
