Brus av god, gamal årgang funne på Fløksand.
I nesten 40 år har Colaflaska lagt på havbotnen, før Kjell Eivind Granbakk (22) fiska den opp. Flaska er intakt, og med kolsyre i.
Det var onsdag kveld at Grambakk og ein kamerat dykka utanfor Fløksand på jakt etter krabbar. Brått fekk Granbakk auge på flaska, som låg delvis nedgrave i sanden, rundt ti meter frå land.
- Både Colaflaska og stålkorken, som er liknande dei som ein finn på vinflasker i dag, er intakt, og utan at forseglinga er broten, fortel Granbakk.
- Det er til og med kolsyre i Colaen enno, skikkeleg kvalitetsbrus med andre ord, seier Granbakk til Nh, etter å ha studert flaska nærare.
På flaska står årstalet 1971. Flaska er med andre ord nesten 40 år gammal.
- I og med at den er funnen ti meter frå land reknar eg med at den har ramla på havet frå ein båt, seier Granbakk, som synest det var eit artig funn.
