Dårleg dag for gamal politikjenning.
Fredag klokka 18.00 fekk politiet i Nordhordland melding om at ein bil som stod parkert utanfor Nordhordland Folkehøgskule hadde vorte påkjørt av ein annan bil.
Det viste seg at sjåføren av bilen som stod for påkjøringa ikkje hadde mykje reint mjøl i posen.
- Bilen var uregistrert, og gjekk på utgåtte prøveskilt. Mannen som kjørte hadde i tillegg til å kollidera i den parkerte bilen, også kjørt på ein gangveg og skremt nokre småjenter.
- Han var rusa på både alkohol og narkotika, opplyser konstituert lensmann i Nordhordland, Kjell Idar Vangberg, overfor Nh.
På toppen av det heile stakk mannen, som er ein gamal kjenning av politiet, av frå staden etter kollisjonen.
I følgje politiet har han ei rekkje tilsvarande forhold knytt til namnet sitt frå tidlegare av, og no er altså lista vorte endå lenger.
