Kristin Minde med konsert på heimebane med fullt band og blåsarar.
Kristin Minde skal i aksjon på kystsogearrangementet på Holmeknappen søndag, og same kveld held ho konsert på Nordhordland folkehøgskule.
I fjor hadde ho konsert i Galleri Rustica i tilknytning til Kystsogevekene i Meland. Den gongen gjorde Kristin så sterkt inntrykk at ho i år er invitert tilbake for å delta i det offisielle kystsoge-programmet.
Kjempegøy
- Kjempemoro. Ekstra kjekt å bli invitert hit til kommunen eg kjem frå, seier Kristin.
Ho kjem til å presentera ein god del av stoffet frå sin ferske CD. Låtar som vekslar mellom det stemningsfulle og balladeprega, til fengande rytmar, og med tekstar som blant anna tar utgangspunkt i Kristin sin oppvekst i Nordhordland.
Band og blåsarar
Denne gongen har ho med seg heile bandet som er med på CD-en. På ein del av låtane på konserten får ho også med seg blåsarar frå Meland musikklag.
Kristin og bandet har deltatt på ei rekkje festivalar i sommar, frå jazzfestivalen i Kongsberg til småbåtfestivalen i Risør.
Festival-punktum
- Konserten i morgon kveld blir eigentleg den siste i denne festivalsommaren. Det kjennest veldig bra å setja punktum på heimebane, seier Kristin.
På bloggen sin skriv ho at ho gjerne får inspirasjon til låtane sine frå enkle observasjonar. Ein sommarfugl på vindaugskarmen, ein samtale, eller eit smil frå mannen i kaffibaren.
Tradisjonsrikt
Som vanleg blir det stor aktivitet på Holmeknappen både lørdag og søndag under kystsogehelga i Meland. Det blir sal og utstilling av kunst- og handverksprodukt, demonstrasjon av handverk og utstilling av gamle kjøretøy og tradisjonsbåtar. Her kan du også skaffa deg tradisjonsmat som sild, flatbrød og lefser, og grønt og småskalaprodukt. I tillegg til Kristin Minde blir det fleire musikalske innslag, mellom anna med songkoret Vågen.
Gamle Oster ligg ved kai på ”Knappen” under kystsogehelga, og lørdag kveld går gamledampen tur med stopp på dei gamle anløpa.
