Det blir både sag og svingande rytmar når Hot Club de Norvege skal få Knarvikmil-veka til å svinga fredag kveld.
-Det blir nok første gong du i festsalen på Nordhordland folkehøgskule høyrer minst to gitarar, munnspel, fiolin, sag og kontrabass i samspel. Garantert ei oppleving der du går ut frå salen med god rytme i kroppen, seier Inger Johanne Ektvedt i Musikkens Venner Nordhordland, som arrangerer konserten som ein del av kulturtilbodet under Knarvikmila-veka.
- Hot Club de Norvege er eitt av dei ”hottaste” liveband i Norge, og har vore kontinuerleg på vegen sidan 1979, sju år lenger enn Aha. Bandet har spelt over heile kloden og blir internasjonalt rekna mellom dei fremste i sin stilart, ofte kalla ”String swing”. Hot Club de Norvege tar utgangspunkt i musikken til den legendariske sigøynar-gitaristen Django Reinhardt, den franske jazzmusikaren kjend for sine improvisasjonar og mjuke stilart.
- Denne type musikk vil heile sikkert få fleire vener når du har høyrt dette bandet live, seier Inger Johanne Ektvedt.
