No er radværingen oppe i elleve Adecco-mål.
Radværingen Sindre Marøy er verkeleg i støtet i Løv-Ham-trøya for tida. Søndag netta han to gongar då Bryne vart senka på eige gras.
Etter nesten halvspelt sesong i Adeccoligaen er det berre Marius Helle frå Bryne som har skåra meir enn Sindre Marøy på nest høgaste nivå i norsk herrefotball.
Det var også nemnde Helle som kom først på skåringslista i søndagens kamp mellom Bryne og Løv-Ham på Bryne stadion. Etter berre 12 minutt banka han inn 1-0 frå 16 meter.
Elleve minutt seinare skapte Sindre Marøy balanse i rekneskapen, då han ekspederte eit innlegg frå ein annan nordhordlending, Matias Møvik frå Stranda, i nettet.
18 år gamle Fredrik Haugen skåra 1-2 for løvene i det 34. minutt, før Marøy på ny var frampå i det 42. minutt. Åleine med keeper var han iskald, og lobba ballen over ein utrusande sisteskanse.
Like før pause sette også Haugen inn sitt andre for dagen, og Løv-Ham gjekk i garderoben med 1-4-leiing mot rogalendingane.
Etter kvilen brukte heimelaget berre fem minutt på å kontra inn 2-4 ved Sverre Larshus Larsen, og på ny hadde kampen nerve.
I det 63. minutt vart Mads Cato Moldskred byta inn for Løv-Ham, og etter berre fem minutt på bana fann han vegen til nettmaskene.
Resultatet 2-5 stod seg kampen ut, og Løv-Ham kunne konstatera tre viktige poeng i den svært jamne Adeccoligaen.
Etter 14 spelte kampar har Marius Helle frå Bryne skåra 17 mål, noko som er klart mest i divisjonen. Sindre Marøy har skåra nest mest i Adeccoligaen med sine elleve fulltreffarar.
Så mykje har ikkje Marøy skåra sidan han spelte for Radøy/Manger i 3. divisjon, og enno er altså sesongen berre halvspelt.
Les fyldig referat frå kampen på her
