Seim-hesten Feset Lynet vann NM.
Seim-hesten Feseth Lynet la all konkurranse bak seg under NM for kaldblodshestar i helga. – Hesten er i kanonslag om dagen, seier eigar Thorbjørn Olsen
Nh sin hesteekspert Olav Lunde melder om at hesten Moe Brage stakk til tet frå start i NM-løpet på Sørlandet Travpark i helga.
Ganske raskt sleppte han likevel til Neslands Loke, som overtok ut av første sving. Feseth Lynet opna på si side roleg, og låg seg i sjette spor utvendig.
Med to rundar igjen overtok Mørtvedt Jerkeld teten og Ramstad Eld hamna i dødens.
På siste bortre sette Feseth Lynet fart, og då gjekk det verkeleg fort. Inn mot siste sving fekk Moe Brage opning og fekk overta teten, men Feseth Lynet var heldig og fekk rygg på Særpefanten rundt siste sving.
Inn på oppløpet vart Moe Brage trøytt, og ute i bana kom Særpefanten i stor fat. Heilt yst var det likevel ein seimar som hadde aller størst fart.
Fem hestelengder
- Han var heilt suveren på slutten, og vann med fem hestelengder, forklarar ein lukkeleg hesteeigar, Thorbjørn Olsen, overfor Nh.
Feseth Lynet er den første Nordhordlandshesten nokon gong til å vinna Norgesmeisterskapen. Førstepremien på heile 150 000 kroner føyer seg fint inn i rekkja av solide gevinstar denne sesongen.
Så langt i år har Feseth Lynet og Feseth Nils, som også er eigd av Olsen-familien, kjørt inn rundt 700 000 kroner. For Olsen er det likevel sigeren som smakar klart best.
- Vi hadde forventningar til han, og ante at han var klar for å vinna. Likevel er det heilt fantastisk at han gjer det, og i tillegg så suverent. Det vart litt av ein fest etterpå kan du tru, fortel Olsen.
- Best i landet
Etter å ha sett seg fast i to løp på rad klaffa det endeleg for Feseth Lynet.
Under førre løp på Jarlsberg Travbane vart han stengt inne til berre 100 meter stod att av løpet, men dei resterande 100 meterane sprang han til gjengjeld fire gongar så fort som konkurrentane, og sikra med det ein tredjeplass.
Olsen visste såleis godt kva hesten hans var god for.
- Han er best i landet no, ingen tvil om det. Det er ein hest borti Sverige som klarar å springa frå han, men elles er han heilt suveren. Å vinna NM er ein utruleg prestasjon, for det er veldig høgt nivå på alle hestane som stiller til start. Å vinna med fem lengder viser kva for ein utruleg form denne hesten er i, seier Olsen.
Damer og pengar
Feseth Lynet har så langt hatt ein fin sommar med mykje god trening og flotte damer.
55 merrer har han bedekka så langt i år, og dei ettertrakta genane hans skal vidareførast ytterlegare utover hausten.
Også på løpssida har Feseth Lynet ein travel seinsommar og haust framfor seg. Om 14 dagar stiller han til start i Skien, og ytterlegare 14 dagar seinare er det Nordisk Elitekamp-løp i Nord-Sverige. 6. september er det nytt løp på Biri, før Åbo i Finland ventar 26. september. Sesongen vert avslutta i Bergen 16. oktober.
I alt kjempar hesten om opp mot 1,5 millionar kroner i førstepremiepengar fordelt på dei resterande løpa.
