Bertine-Helene Færø imponerte.
Bertine-Helene Færø slo til med eit kjempeløp på 3000 meter hinder under senior-NM i Sandnes i helga.
Med tida 11.19.75 sette den unge AKS 77-løparen ny personleg rekord på distansen, og innkasserte samstundes medalje i sitt aller første senior-NM.
Som Nh tidlegare har skrive var Bertine-Helene berre ei hårsbreidd frå å klara NM-kravet på 1500 meter, men litt for mykje motvind øydela i siste seriestemnet på Knarvik stadion før NM.
3000 meter hinder vart ho derimot kvalifisert for, og her gjekk det altså strålande.
Storebror Halfdan-Emil sprang også 3000 meter hinder under NM i Sandnes, og også han varta opp med eit svært solid løp.
Tida 9.37.45 held til ein sterk sjetteplass, og er også ny personleg rekord for AKS 77-løparen.
Også i diskosringen hadde AKS 77 med ein utøvar. Sandra Sudmann hadde ikkje heilt dagen, og med eit kast på 34.40 enda ho til slutt på ein 11. plass i senior-NM-debuten.
- Klubben er godt nøgd med innsatsen og er stolte over gode resultat, seier Marit Aase i AKS 77.
