Klart for autoslalåm hjå Nomaco.
Det blir full fres på Nomaco sitt fabrikkområde på Mongstadbase når det siste løpet i autoslalåm-cupen går av stabelen søndag.
Fleire i den ypperste norgeseliten er på plass når tredje og siste løpet i Nordhordlandscupen i autoslalåm blir kjørt på Mongstad i morgon.
- Dette løpet har tidlegare år gått i Manger senter, men er i år flytta til Nomaco sitt område på Mongstad. Her er det stor og flott plass, som gjer det lettare å leggja ei god og spennande løype. Det blir garantert ei fartsfylt førestilling, seier Terje Villanger i NAF Motorsport Nordhordland.
Nybyrjarklasse
Det skal kjørast tre omgangar, der dei to beste tel samanlagt.
I tillegg til klasse 1 (standardbilar) og klasse 2 (modifiserte standardbilar) er det også eigen klasse for nybyrjarar.
- Vi veit det finst mange motorinteresserte ungdomar i Austrheim, og dei er velkomne til å prøva seg, seier Villanger.
Han fortel at NAF Motorsport Nordhordland har eit spesielt tilbod nettopp til den unge garde.
Også lærekjøring
- For dei som har lyst til å prøva seg i bilsport-samanheng, så er dette det enklaste og rimelegaste alternativet, seier Villanger.
Han minnar om at dei som driv og lærekjører også kan delta i løpet, med sjåfør ved sida og gjennomført trafikalt grunnkurs.
Sju i NM
Eivind Løland er NAF Motorsport Nordhordland sitt største håp i autoslalåm-cupen. Han er i ferd med å bygga om bilen sin, men vart likevel nr 7 i NM forrige helg.
Terje Villanger var både stemneleiar, speaker og løypeleggar i meisterskapet i Hemsedal.
Villanger oppmodar folk til å koma til Mongstad for å oppleva autoslalåm-løpet på Mongstad.
- Det blir mykje fart og spenning, og god underhaldning, seier han.
