Mjøs matchvinnar mot NHH.
Radøy/Manger er oppe på sikker plass igjen etter å ha slått tabellnaboane frå Noregs Handelshøgskole 1-0 på Sletta onsdag kveld.
Før kampen låg Radøy/Manger på den utsette 7. plassen som i år gir direkte nedrykk. Med midtvekas tre poeng er laget oppe på 5. plass.
Radøy/Manger var det klart førande laget i første omgang, men Tormod Mjøs var den einaste som klarte å finna vegen til nettmaskene etter rundt kvarteret.
Det burde vorte fleire skåringar før pause, men det ville seg ikkje for raudtrøyene framfor kassen.
Etter kvilen kom studentlaget frå Bergen meir med i kampen, men Radøy/Manger forsvarte seg svært godt.
Kampen ebba ut med 1-0, tre særs viktige poeng i ei tett og jamn avdeling i 4. divisjon.
